CAGAYAN DE ORO CITY – Gusto sa interim management nga manubag ang set aside officials kon nganong wala magamit ang giutang sa Cagayan de Oro Water Distric o COWD sa Development Bank of the Philippines o DBP nga balor 200 milyones pesos nga technical equipment nga magtubag sa dako nga non-revenue waters sa dakbayan.
Kini human mihimo sa sorpresa nga inspection ang interim General Manager Fermin Jarales sa warehouse sa COWD-Kauswagan nunot sa impormasyon nga natanggong lang ang kagamitan sa pagpalambo sa serbisyong panubig.
Miingon si Jarales nga tuig 2017 pa nahuptan sa COWD ang maong kagamitan apan wala gamita ug katingad-an kay pag-abot sa imbetaryo sa 2022,wala na kini naapil sa listahan.
Sa pikas bahin, COWD Asst General Manager Engr Edna Najeal,chairman sa non-revenue water projects nga walay basehan ang pasiatab sa interim management.
Miingon si Najeal nga hagbay ra nagamit ug nataod alang sa katuyuan ang mga materyales sa mga proyektong patubig.
Siya miingon nga dugang suplay na lang sa mga proyekto sa COWD ang nakit-an sa interim officials sulod sa maong bodega.
Hisayrang nakasaway usab kini mapangahason nga pagsulod ni Jarales sa COWD warehouse nga wala mosubay sa gisunod nga mga proseso.
