CAGAYAN DE ORO CITY-Gihagit ni retired C/Supt Agripino Javier si PNP regional director C/Supt Tim Pacleb nga ipakita ang tanan niining abilidad sa pagmintinar sa kahusay’g kalinaw alang sa katawhan dinhi sa rehiyon.
Kini ilabina nga nag-atubang sa bahad sa terorismo ang Mindanao tungod sa pag-atake sa teroristang ISIS-Maute sa Marawi City.
Gibutyag ni Javier nga magamit pag-ayo ni Pacleb ang iyang abilidad ilabina sa pagsilbi niini kaniadto nga director sa intelligence group sa Camp Crame aron masanta ang pagsabotahe sa seguridad ilabina dinhi sa syudad.
Samtang prioridad karon ni Pacleb ang paghatag seguridad aron masanta ang pagsulod sa kagubot sa Northern Mindanao gikan sa Marawi City,Lanao del Sur.
Kini tungod sa paningkamot sa militar nga hingpit nang mapuhag ang teroristang ISIS-Maute nga nagtinguha pag-ilog sa Marawi City.
Matud ni Pacleb nga kuyog sa militar ug local govt units,dungan nila nga ipadayon ang anti-terrorism campaign nga nasugdan ni Javier.
Samtang dili gusto ni PNP chief director Gen Ronald de la Rosa nga mahisama sa Marawi City ang sitwasyon sa seguridad sa katawhan nga nanimuyo dinhi sa rehiyon.
Kini ang hinungdan nga gimanduan ni De la Rosa ang tanang kapolisan nga tabangan si Pacleb sa pagbantay batok sa bisan unsa nga lakang gikan sa mga teroristang grupo sama sa ISIS-Maute sa Marawi City.
Gihimo pang pananglitan sa heneral ang pipila ka pulis sa Luzon nga dili prioridad ang serbisyo sa katawhan apan sa ilang mga kaugalingong interes lamang.
Si De la Rosa ang nagsilbing dinapit nga mamumulong sa pag-retiro ni Javier sa PNP-10 kagahapong adlawa.
