CAGAYAN DE ORO CITY – Gitahas ni City Mayor Oscar Moreno nga imbestigaran kon nganong namatay human matupuki sa Astrazeneca vaccine ang 73 anyos nga senior citizen sa vaccination rollout sulod sa SM Downtown Premier sa syudad kagahapong adlawa.
Kini human gikasubo ni Moreno ang hitabo sa biktima nga si Zoilo Joaquin Borcillo nga taga-Brgy Agusan nga gusto lamang unta ma-proteskyonan batok sa COVID-19.
Miingon ang mayor nga tumong sa imbestigasyon nga maduso usab ang kumpletong impormasyon sa hitabo padulong sa DoH-Manila.
Giangkon ni Moreno nga dunay epekto niini sa vaccination program apan magpadayon gihapon sa pagpamakuna sa katigulangan ning syudad.
Samtang mi-depensa si City health cluster head Dr William Bernardo kon nganong wala mabantayi nga sensitibo ang kahimtang sa panglawas sa biktima nga si Borcillo nga kabahin sa nagbakuna sa syudad.
Miingon si Bernardo nga walay gisulti si Borcillo nga dunay giatubang nga serious health problem.
Apan nasuta usab nga dunay gitumar nga tambal alang sa maintenance ang biktima.
Gidala pa sa city hospital ang biktima apan wala na kini matabang pa sa mga doktor kagahapon sa udto.
Dugtong niini,nabalaka ang pipila ka opisyal nga mosamot pagminus ang mga senior citizen nga magpabakuna batok COVID-19 gikan sa Brgy Agusan ning syudad.
Kini tungod sa kamatayon sa 73-anyos nga lolo.
Gibutyag ni Agusan Brgy Secretary Kenneth Piloton nga sa wala pa ang maong hitabo, minus nang daan ang ihap sa senior citizen nga misanong sa pagpabakuna sa gobierno.
