CAGAYAN DE ORO CITY, Philippines – Gitataw sa gobyerno sa Brazil nga anaa lamang sa 61 ang ‘head count’sa mga namatay sa trahedya sa Sau Paulo, inay 62.
Namahayag si Captain Maycon Cristo, tigpamaba sa São Paulo Fire Brigade nga nadawat na nila ang masterlist sa 57 pasahero nga misakay sa Voepass plane, kuyog ang 4 ka crew.
Dunay usa ka lalaki ang wala midayon sa iyang pagbiyahe.
Una niini, miangkon si Cristo nga nagkalisud sila sa retrieval operation ilabe nga pipila ra ka bahin sa lawas ang ilang narekober.
Gipreserbar na sa mga otoridad ang narekober nga black box kung asa nahimutang ang flight data recorder (FDR) ug ang cabin voice recorder (CVR).
Tungod sa hitabo, gisuspeno una sa kompanya ang pagpalupad sa ilang mga ATR 72 twin-engine turboprop nga abyon.
