CAGAYAN DE ORO CITY – Nagsaka pa ang ihap sa views sa social media sa init nga “Debate sa Bombo” sa upat ka nagpapili pagka-mayor sa syudad sa 2019 midterm elections sa Mayo 13.
Kini human gikan sa 25-mil ka views samtang gihimo ang debate sa programang Zonalibre sa Bombo Radyo diin init gilantugian ang mga isyu sa kurapsyon,moralidad ug ubang hitabo diin nag-sentro sa interes sa dakbayan.
Kabahin sa mga milambigit sa debate si reelectionist City Mayor Oscar Moreno ingon man sila si Pompee La Viña,Benjamin Contreras ug contractor Doc Felix Borres III nga sinaksihan sa upat ka panelists gikan sa simbahan,legal,non-governmental organizations ug mismno sa Commission on Elections sa miaging Abril 6 ning tuiga.
Tungod sa maong debate,nag-abot na sa halos 60-mil ka views sa Facebook ang netizens nga naminaw sa gipanghisgutan sa mga kandidato rason dul-ag 9-mil na nagpadayag sa lain-laing komento ug halos 2-mil na usab ang nag-share niini.
Una nang miani’g pagdayeg ang inisyatiba sa Bombo Radyo Philippines gikan sa mismong publiko tungod sa talagsaong kapasidad makadumala sa ‘Debate sa Bombo’ sa tibuok nasud.
Nasayran nga laraw lamang sa Bombo Radyo mapatubag ang mga kandidato sa mga isyu nga nag-sentro kanila,pag-edukar sa mga botante ug pagsunod sa resolusyon sa Comelec diin hataga’g libre nga oras ang tanang personalidad nga milambigit sa piliay ning tuiga.
