Aminado ang buhatan sa PSA Region 10 nga adunay pagkalangan sa pag-abot sa physical National ID cards ngadto sa pipila ka mga aplikante nga hangtod karon wala pa makadawat sa ilang kard.
Sumala ni Jojo Tuason, Chief Administrative Officer sa Civil Registration sa PSA Region 10, samtang wala pa mapatuman sa rehiyon ang printing sa mga ID, ligal ug dawaton gihapon ang tanang porma sa National ID — lakip ang paper ID ug digital ID nga mahimong ma-download sa cellphone kung wala pa ang physical card.
Giingon niya nga nagpadayon pa ang pilot testing sa sistema sa pag-print sa physical ID cards isip kabahin sa bag-ong pamaagi sa ahensya.
Tumong matod pa nila nga sa dili pa matapos ang tuig, ma-decentralize na ang printing process aron matag rehiyon ug probinsya na mismo ang magdumala sa pag-imprenta sa National ID cards. Kini aron mapaspasan ang paghatod sa National ID sa katawhan.
