CAGAYAN DE ORO CITY – Nagtoo si Xavier University Law School Professor Atty. Oscar Moreno nga dili molampos ang senate resolution aron ipabasura ang impeachment complaint nga giatubang ni Vice Pres Sara Duterte.
Kini tungod kay mas motigbabaw ang kasuguan sa konstitusyon nga angayang matuki ang articles of impeachment nga giatubang sa bise-presidente.
Siya miingon nga hinoon,adunay mga isyung-legal nga ang resolbahon sa plenaryo sa senado ayha makalahos sa gisugo sa balaod kabahin sa maong isyu.
Apan mipabati usab kini sa iyang kahingawa kung magbaton ba sa quorum sa mga senador ang paghisgot niini sa senado karong Hunyo 11 sa hapon.
Una nang namayayag ang pipila ka abogado ning syudad nga wala sukad nahitabo nga motigbabaw ang mga mani-obra sa pipila ka senador kaysa unsay nasulat sa batakang balaod.
