Gipasiugda ni Department of National Defense (DND) Secretary Gilberto Teodoro Jr. ang kamahinungdanon sa pagmintinar sa kasaligan nga presensya ug pagpugong sa mga hulga sa Kalayaan Island Group.
Atol sa ika-76 nga anibersaryo sa Philippine Marine Corps (PMC) sa Fort Bonifacio niadtong Nobyembre 7, 2026, gipasiugda sa kalihim ang panginahanglan sa mas hugot nga koordinasyon tali sa PMC, Philippine Army, Philippine Navy, Philippine Air Force ug Philippine Coast Guard aron mapalig-on ang depensa sa nasud.
Giawhag usab ni Teodoro ang malungtarong pagpalambo ug pagpalapad sa kapasidad sa PMC, lakip ang pagtukod og mga estratehikong base militar nga mahimong ipahimutang tupad sa kasamtangang mga pasilidad militar o tukoron isip bulag nga instalasyon.
Dugtong niini, gipasiugda usab sa kalihim ang pagpalig-on sa kaandam sa logistika ug pagbaton og igong pisikal nga reserba aron masiguro ang kaandam sa nasud sa pag-atubang sa mga hagit sa depensa. (raniel mahunyag)
