CAGAYAN DE ORO CITY – Gisugdan ang usa ka makasaysayang panag-alyansa tali sa Phividec Industrial Authority ug Del Monte Philippines Inc aron mapalambo ang agrikultura ug ekonomiya sa Northern Mindanao.
Gibutyag ni Phividec administrator ug chief executive officer Atty. Joseph Donato Bernedo nga wala lamang sila mohupot sa mga pantalan ug pabrika, apan nagsugod na usab sila sa pagpananom aron makapakaon sa kalibutan.
Dugang ni Bernedo, ang ilang kasabutan sa Del Monte usa ka binhi sa panan-awon nga mag-agad sa pagsalig, pagkamalahutayon ug sa usa ka damgo nga patas ug inklusibo ang pagtubo sa Mindanao ug sa katawhang Pilipinnhon.
Giklaro usab niya nga ang Phividec karon dili na lamang usa ka industrial zone apan usa na usab ka plataporma para sa panaghiusa sa agrikultura ug industriya nga makahatag og trabaho, kalambuan sa komunidad ug dugang kita sa mga lokal nga mag-uuma.
Hisayrang sobra 100 ka ektarya ang gamiton sa kompanya aron tamnan sa mga pinya ug kapayas nga kabahin sa export products padulong abroad.(With reports of Bombo James Oliver).
