CAGAYAN DE ORO CITY- Moduso’g motion sila si dismissed Supt Michael John Deloso ug PO2 Ernesto Galleto aron mapadali sa Court of Appeals o CA ang pagresolbar sa ilang petisyon batok dismissal order gikan sa Ombudsman.
Kini human gipatuman na sa PNP-10 ang pagtangtang kanila ni Deloso ug Galleto sa kasong gipasaka ni Atty Ernie Palanan nga serious dishonesty ug grave abuse of authority niadtong tuig 2014.
Giangkon ni Deloso nga apektado ang ilang panginabuhian ni Galleto sa gihimo ni Palanan batok kanila.Samtang giawhag ni PNP regional director C/Supt Agripino Javier ang kapolisan nga magmatngon sa ilang trabaho ug likayan nga makahimo’g ilegal nga mga kalihukan.
Namahayag si PNP regional spokesperson Supt Lemuel Gonda nga pasidaan kini ni Javier sa kapolisan tungod sa pagkatangtang sa pagka-pulis nila ni Deloso ug Galleto gumikan sa alegasyon sa extortion diin naabot ang kaso sa Ombudsman.
Si Gonda miingon nga makabalik lamang sa pagka-pulis sila si Deloso ug Galleto kon balihon sa Court of Appeals o CA ang dismissal order nga gipahamtang kanila.
Si Deloso ug Galleto ang nasikop sa entrapment operation sa NBI-10 nga aktong midawat sa P6-mil nga extortion money gikan kang Palanan sulod sa usa ka restaurant ning syudad sa miaging Marso 2014.
