CAGAYAN DE ORO CITY – Mikutlo na’g 51 ka kinabuhi nga sagad sa kabataan ang pagsaka’g balik sa kaso sa sakit nga dengue nga epekto sa mga paak sa lamot sa Northern Mindanao sugod Enero hangtod Agosto ning tuiga.
Namahayag si Jasper Kent Ola,registered nurse ug head sa Department of Health 10’s Research Epidemiology Surveillance and Disaster Response Unit nga sa 11-mil 546 ka kaso, 9-mil 739 niini ang na-admit sa nagkadiayang ospital ug 314 ang kompirmado nga natakbuyan sa sakit.
Siya miingon nga sa maong kompirmadong kaso, 51 ang namatay nga sagad nag-edad 5 hangtod 11 anyos.
Nag-una sa mga nagbaton sa taas nga kaso ang Bukidnon nga dunay 4-mil 949 tungod sa 70 porsientong pagsaka;Camiguin nga 115 percent ang nadugang o 959 ka kaso; Misamis Occidental nga dunay mil-798;Misamis Oriental nga 136 percent ang pagsaka o 2-mil 052 ka kaso ug Cagayan de Oro nga milista usab sa 736 ning tuiga.
