CAGAYAN DE ORO CITY-Giakusahan ni San Simon Brgy Kap Rodolfo Nacario ang pipila ka ahensiya sa gobiernong lokal nga nagpasagad sa katukuran ug presensiya sa engineered sanitary landfill diha sa Brgy Pagalungan sa dakbayan.
Kini human miatubang si Nacario atol sa special city council hearing ug gibarugan nga apektado ang pipila sa mga residente niini tungod sa duga gikan sa basurahan nga mipadulong sa ilang sapa.
Nagtoo si Nacario nga wala ma-obserbahi sa mga ahensiya sa gobierno sama sa Environmental Management Bureau o EMB sa Dept of Environment and Natural Resources -10 ang ‘checks and balances hinungdan nahitabo nga gitakbuyan sa pagpangatol ang kalawasan sa pipila sa iyang mga residente sa lugar.
Una usab niini,gibarugan ni Pagalungan Kap Eric Naparete nga nakurat siya sa pasangil ni Nacario ilabina nga mismo ang iyang mga residente ang walay nasinatiang pagpangatol sa kalawasan human maligo sa ilang sapa.
Samtang gihagit ni Solid Waste Management Task Force head Oliver Egypto si Nacario nga magsilbing responsabli sa iyang gilugwang mga pahayag atubangan sa publiko.
Kini human nag-akusar si Nacario nga nagsakit ang pipila sa ilang mga residente dihang naligo sa kontaminadong sapa ‘duga’ nga gikan sa engineered sanitary landfill sa Brgy Pagalungan sa dakbayan.
Angayan unta nga nangunsulta una si Nacario sa environment ug health experts ayha nagpagawas sa iyang komento kabahin sa alegasyon niini.
Una nang gibutyag usab ni City Health Officer Dra Fe Bongcas nga maglisod sila pagtoo nga may kontaminasyon sa tubig hinungdan sa ‘fishkill’ kay walay natala niini sa mga sapa sama sa Brgy Pagalungan padulong sa Iponan River.
