CAGAYAN DE ORO CITY-Dili angay mabalda ang operasyon sa Seven Seas Water Park and Resort nga nag-okupar sa kontrobersyal nga 50 ektarayang luna sa yuta sa lungsod sa Opol, Misamis Oriental.
Kini human gitugtan sa DENR nga mahimua’g titulo ang maong bahin sa yuta sa pribadong mga tawo rason nga napalit ni Engr Elpedio Paras aron tukuran sa balor 200 milyon pesos nga resort.
Miingon si Opol Mayor Max Seno nga angay manubag ang DENR sa ilang walay klaro nga hukom diin apektado na ang operasyon sa negosyo ni Paras nga nakatabang sa katawhan sa ilang lungsod.
Samtang giangkon ni DENR regional director Arleigh Adorabli nga may legal action sila nga gipasaka aron wad-an sa bili ang titulo sa yuta nga napalit sa nagdumala sa maong resort.
Miingon si Adorabli nga giduso nila kini sa korte aron mahataga’g katin-awan sa angay buhaton ilabina nga gikan sa pagka-timberland sa yuta, napa-tituluhan ug nagbaligya sa pribadong tawo.
Giangkon sa DENR nga dunay mga kasaypanan sa ilang mga hukom kaniadto hinungdan nga nagka-problema ang legal claim sa gobierno niini.
