CAGAYAN DE ORO CITY – Gimanduan na ni Deparment of Environment and Natural Resources o DENR Secretary Maria Antonio Loyzaga nga mohimo’g subsob nga pakisusi sa kahimtang sa engineered sanitary landfill sa Brgy Pagalungan ning syudad.
Kini human sulati ni kanhi City Mayor Oscar Moreno ang kalihim aron ipaabot ang daw walay klaro nga pag-atiman sa waste management sa syudad taliwala nga gagasto’g minilyong salapi isip bayad sa naka-kontra nga kolektor sa basura sa dakbayan.
Miingon si Moreno nga gipalihok pa sa city hall ang kabarangayan ug pipila ka departamento niini sa pagpanghakot sa basura taliwala nga trabaho kini sa JOMARA-TENCIL nga adunay minilyong kontrata kada-tuig.
Una usab niini,gitawag nga dakong bakakon ni CLENRO manager Engr Armen Cuenca ang imbento nga estorya ni Moreno nga kanhi niya alyado sa milabay’ng administrasyon.
Siya miingon nga dili tinood ang sulti sa kanhi mayor ug angay gani kini basulon kon nganong wala makalihok pagtarong ang sanitary landfill tungod sa pipila ka kakulangon.
