Gipamugos karon sa Philippine Movement for Climate Justice (PMCJ) Mindanao nga dili na kinahanglang mangutang pa sa gawas ang nasud o magpalisod sa publiko alang sa pag-ayo sa Agus-Pulangi Hydroelectric Power Complex.
Gipahinumdoman ni Pat Jared Pangantihon sa maong pundok ang gobyerno nga adunay kaugalingong pondo ang kagamhanan sama sa Sovereign Wealth Fund nga pwedeng kuhaan og puhunan alang sa maong planta sa kuryente.
Gikatingala usab sa maong opisyal kon ngano nga wala gitagaan og konsiderasyon sa Department of Finance ang maong pamaagi aron maayo ug mapanalipdan ang pasilidad sa enerhiya sa isla.
Dungan niini, gikasubo sa maong grupo nga mas gipili pa sa kagamhanan ang pamaagi nga public-private partnership nga nag-abli sa pultahan aron itugyan sa mga adunahang negosyante ang maong yuta ug asset sa publiko.
