Gipahugtan pa sa Department of Education o DepEd Region 10 ang seguridad sa mga eskwelahan sa Northern Mindanao aron mapugngan ang bisan unsang pamusil ug krimen sulod sa mga tunghaan.
Mao kini ang gipahayag ni DepEd Region 10 Chief Education Supervisor Dr. Ricardo Dragon subay sa ilang pagpatuman og mga lakang sama sa paggamit og metal detector, pagsusi sa mga kural, ug pagbutang og CCTV camera.
Gitin-aw sa opisyal nga prayoridad karon ang pag-ayo sa mga guba o kulang nga perimeter fence aron walay makasulod nga mga kawatan ug daotang tawo nga makapanakit sa mga bata.
Gawas pa niini, nanawagan usab ang ahensya sa mga barangay ug opisyal sa lungsod nga magpakatap og dugang nga mga guwardiya ug watchman tungod sa kakulang sa mga opisyal nga posisyon alang sa seguridad sa mga eskwelahan.
