CAGAYAN DE ORO CITY – Wala isalikway sa Bureau of Fire Protection nga dunay kalabutan sa napasagdan nga koneksyon sa koryente ang hinungdan sa pagkasunog sa 67 ka tuig nang tunghaan sa Camp 1 Elementary School sa Brgy Agusan Canyon,Manolo Fortich,Bukidnon.
Miingon si BFP-Manolo Fortich Sub-Station ground commander FO3 Francis Ted Galarrita nga nagsugod ang kalayo sa conference room ug paspas kining mikaylap sa laing 14 ka lawak saringan sa maong tunghaan.
Hinoon,giklaro ni Galarrita nga walay bisan usa ka tawo o bata nga naangol kay natigayon ang sunog mismo sa pagsaulog sa todos los santos.
Unang mitala ang maong sunog sa 11.5 milyones pesos nga structural damage.
Samtang dili mabalda ang pagkat-on sa sobra 300 ka tinun-an bisan kon nahurot kaugdaw ang mga lawak saringan.
Kini maoy gipaniguro ni DepEd 10 regional director Arturo Bayucot kabahin sa hitabo.
Miingon si Bayucot nga nagsugod na sa koordinasyon ang ilang principal ug division supervisor ngadto sa Manolo Fortich LGU alang sa ipatuman nga class adjustments.
Gihinaut usab sa opisyal nga gilayong makapadala’g quick response fund si Vice Pres Sara Duterte aron masiguro nga dili maputol ang pagtudlo sa mga bata.
