Posible nga teenage depression ug conduct disorder ang gipangtan-aw nga nag-unang hinungdan sa nahitabong trahedya sulod sa Ateneo de Zamboanga Junior High School, diin usa ka estudyante ang namusil sa iyang kauban sa tunghaan ug nagtiwas sa iyang kaugalingon kinabuhi.
Mao kini ang gipahayag sa mental health consultant nga si Stella S. Ferrarez, RPM. Iyang gipasabot nga ang homicidal ug suicidal tendencies lakip sa mga bug-at nga sintomas sa usa ka tawo nga naa sa lawom nga depresyon.
Gidugang sa eksperto nga angay usab nga susihon sa mga awtoridad ang kaagi sa bata kon aduna ba kini gipakitang conduct disorder o mga daan nga rekord sa pagpanakit ug paglapas sa mga lagda sa eskwelahan.
Subay niini, gipadayag ni Ferrarez nga kinahanglan usab nga matuki sa pakigsusi ang mga triggering factors aron mahatagan og katin-awan kon unsa gayud ang nagduso sa suspek sa pagbuhat sa maong ngilngig nga krimen.
