CAGAYAN DE ORO CITY – Gitumbok ni Deputy House Speaker ug Cagayan de Oro 2nd District Rep.Rufus Rodriguez nga posibleng politika ang motibo sa iyang nadawat nga bahad sa kinabuhi pinaagi text messages ning syudad kagahapon sa buntag.
Miingon si Rodriguez nga wala siya’y nadumduman nga dunay mga tawo nga iyang na-agrabiyado aron kini baharan nga patyon.Namahayag si Rufus nga gisalig na lamang niya sa Police Regional Office 10 ug NBI 10 ang pagtumbok sa mga tawo nga utok sa pagbahad sa iyang kinabuhi.
Sulod sa text messages gikan sa celphone numbers 0955-097-3676 ug 0955-097-4289 nga kaya daw nila tumbahon si Rufus kay dili niini ang giingong taga-tabok.
Dumduman nga sa miaging Setyembre 29,2021,gi-itsahan usab sa granada ang ilang ancestral house sa Brgy Nazareth ning syudad apan wala damyos nahimo niadto.
Samtang gimando ni Police Regional Office 10 Director Brig Gen Benjamin Acorda Jr kang COCPO Director Col Aaron Mandia nga imbestigaran ang nadawat nga death threats ni Rodriguez.
Gikompirmar sa Bombo Radyo ni Acorda nga nakig-koodinar kaniya ang kongresista tungod sa hulga sa kinabuhi niini.
Gibutyag sa heneral nga subay sa ilang inisyal nga imbestigasyon,naggikan ang texter/s sa Koronadal City sa South Cotabato ug wala dinhi sa Northern Mindanao.
Siya miingon nga gilugwa na niya ang diretkiba kang Mandia aron masulbad sa labing dali nga panahon kon ugaling tinud-anay nga may mga tawo nagtinguha sa kinabuhi sa kongresista
