Mismo si Misamis Oriental 1st District Representative Karen Lagbas nagkanayon nga dili niya mapamatud-an kon tinuod ba ang giingon nga adunay mga kongresista nga mibotar sa impeachment ni Vice President Sara Duterte tungod sa mga offers o proyekto, kay siya mismo wala makadawat og ingon ana nga pamaagi.
Matod sa kongresista, wala siyay bisan unsang kahibalo o kasinatian sa maong alegasyon ug walay niabot nga bisan unsang offer o hulga kaniya kalabot sa botohan.
Gipasabot niya nga ang nahitabo sa Kamara para kaniya usa ka conscience vote nga base sa personal nga pagtan-aw ug responsibilidad sa matag mambabalaod.
Dugang pa ni Lagbas, isip abogado, dili nila mahimong isalikway ang mga impormasyon ug ebidensya nga gipresentar sa proseso, ilabi na ang bahin sa probable cause nga gihisgutan sa impeachment proceedings.
Giingon usab niya nga kinahanglan gihapon nga barogan ang nakita nga probable cause ug sundon ang legal nga pamaagi sa paghusay sa isyu.
Busa alang sa kongresista, ang ilang desisyon kinahanglan magpabilin nga nakaangkla sa balaod, konsensya ug hustong proseso sa gobyerno.
