CAGAYAN DE ORO CITY – Masulbad na sa dili madugay ang pagpi-ot sa mga piniriso sa nagkadaiyang mga selda sa napulo ka police stations ning syudad.
Kini human unang gikasuko ni City Mayor Oscar Moreno ang pagpasagad nga maatiman ang mga piniriso samtang nag-atubang sa pandemya ang dakbayan.
Miingon si Moreno nga kabahin sa mga lakang ang pagpadali nga mapasaka ang kaso sa korte ug ang paggamit sa BJMP building nga unang natukod sa syudad sa miaging katuigan.
Gihimo sa mayor ang lakang kay naglisod ang mga pulis pag-atiman sa mga piniriso kinsa gibalibaran sa BJMP nga dawaton tungod sa mando sa korte suprema.
Samtang nakaandam pagdawat ang BJMP-10 sa bisan kinsa nga piniriso nga ipasulod sa ilang gidumala nga pasilidad ilabina sa city jail sa Brgy Lumbia ning syudad.
Gihimo ni BJMP-10 spokesperson Senior Jail Insp Danilo Delgado ang katin-awan human nahimong dakong isyu ang pagdumili pagdawat nila sa mga piniriso nga mga dinakpan sa nagkadaiyang police stations ning syudad.
Miingon si Delgado nga igo ra sila misunod sa circular order sa korte suprema nga gisubay sa hangyo sa Bureau of Corrections nga suspendido una ang pagpangdawat sa mga piniriso nunot sa bahad sa coronavirus disease.
