CAGAYAN DE ORO CITY-Gikalipay sa Bureau of Jail Management and Penology o BJMP ang pag-ubos sa ihap sa mga piniriso sa Lumbia City Jail.
Matud ni Male Dormitory Media Affairs & Community Relations Service Officer, JO3 Orly Vicente Montalban nga anaa na lamang sa 2500 ka detainees ang anaa sa maong bilangguan gikan sa 2900 sa miaging mga bulan.
Siya miingon nga miubos ang ihap sa mga binilanggo tungod sa plea bargaining program nga gitanyag sa korte sa mga binilanggo.
Sagad sa mga binilanggo sa Lumbia City Jail ang dunay mga kaso sa pagbaligya ug paggamit sa gidiling droga.
Samtang mapasalamaton usab ang BJMP sa P19.2 million nga gihatag nga budget sa local govt alang sa dugang katukoran sa mga prisohan.
Si JO3 Montalban miingon nga dako’g ikatabang ang 3-storey building aron dili na maghu-ot ang mga piniriso sa prisohan.
Nagtoo si Montalban nga mahimo na kining maggamit sulod ning tuiga.
