(Update) CAGAYAN DE ORO CITY – Gikompirmar sa kapolisan nga ang Dawlah Ismaliyah Maute Terrorist Group ang mibomba sa mga nanimba nga mga estudyante ug mga magtutudlo sa Mahommad Dimaporo Gymnasium,Marawi State University main campus sa Marawi City,Lanao del Sur sa miaging Domingo.
Kini subay sa kompirmasyon ni PNP spokesperson Col. Jean Fajardo pinasikad usab sa resulta sa imbestigasyon sa SITG Dimaporo Gym Explosion nga unang mikalas sa duha ka magtutudlo ug laing duha usab ka tinun-an ang maong hitabo.
Giila ang mga terorista nga misulod sa gym aron pabuthon ang bomba nga sila Arsani Mimbesa alyas Lapitos ug Khadafi Mimbesa alyas Engr nga managsama nga nakuhaan sa CCTV camera sa bisinidad sa MSU.
Dugang ni Fajardo nga subay usab sa MSU bombing survivors,gikaatubang pa nila si alyas Engr sa mismong pagsugod na sa santos nga misa ayha ang pagbuto sa improvised explosive device.
Nasuta nga dunay nagkadaiyang kasong murder ug ubang heinous crimes nga giatubang ang duruha nga pulos taga-Lanao del Sur.
Tipik sa mga namatay sila MSU faculty members Riza Ramos Daniel, Evangeline Aromin ingon man ang mga tinun-an nga si Janine Arenas ug Junrey Barbante nga taga- Tangub City,Misamis Occidental.
Samtang gihikay na sa Police Regional Office -Bangsamoro Autonomous Region o PRO-BAR ang mga kasong kriminal batok sa teroristang grupo nga Dawlah Islamiyah Maute nga utok sa pagpabuto’g improvised explosive device.
Kini human tumbuka ni PRO-BAR Director Brig Gen Allan Nobleza nga ang grupo nila ni Khadafi Mimbesa alyas Engr ug Arsani Mimbesa alyas Lapitos ang mipabuto’g bomba sa mga manimbahay’ng Katoliko sa Dimaporo Gymnasium sa MSU- main campus sa miaging Domingo sa buntag.
Nanganti ang heneral nga gamiton ang tanang resources sa gobierno aron madakpan ug manubag sa ilang mga kasa-lanan ang mga terorista.
Dugtong usab niini,gipasalig ug gihupay sa mga opisyal sa MSU-Marawi main campus nga dili na masubli nga masudlan sila’g mga terorista sa ilang mga kalihukan.
Gihimo ni MSU System President Atty. Basari Mapupuno samtang hinay-hinay sila nga mibangon gikan sa trahedya nga miigo sa ilang unibersidad.
Miingon si Mapupuno nga dakong kausaban sa ilang internal security ang ipatuman samtang anaa ang duha ka magkalahi nga special team gikan sa PNP ug AFP sa bisinidad sa unibersidad.
Sa pikas bahin,nanganti si Lanao del Sur 1st District Cong. Zia Adiong nga dili na basba-basta malugwa ang binilyong pondo sa intelligence funds alang sa AFP ug PNP kon malutsan sa laing higayon sa mga terorista ang seguridad sa Marawi City ug ubang bahin sa nasud.
Kini human sobra ka dismayado ang Lanao Sur officials nga naigo na usab sila sa terroristic attack nga hinimuan sa susamang grupo nga nangatake sa Marawi City sa miaging tuig 2017.
Hisayrang tungod sa hitabo,napugos ang sobra libo ka MSU students pagpanguli sa ilang mga probinsya sugod sa adlaw’ng Domingo sa gabii.
