Dili imposible nga musaka pa sa 100 hangtud sa 150 pesos kada litro ang presyo sa produktong petrolyo sunod semana kung dili mahupay ang tensyon sa Middle East, ug dili biyaan sa puwersa sa Iran ang Strait of Hormuz. Kini ang nakitang talimad-an ni Manny SD Lopez, lead convenor sa People’s Constitutional Reform Initiative (PCRI). Miingon si Lopez sa BOMBO RADYO nga kung musaka ang presyo sa krudo ug gasilona, taas usab ang presyo sa elektrisidad, ug ubang batakang serbisyo. Nagtoo si Lopez nga dili lang mga kabus ang masakitan sa seryoso nga ekonomikanhong krisis sa lana, apan, ang mga nasud nga nagsalig sa lana sa Middle East. Busa gi-awhag sa PCRI ang gabinete ni Ferdinand Marcos Jr nga maghuna-huna na sa mga alternatibong pamaagi sa pagkuha’g lana sa Russia, aron magpadayon ang supply chain sa ekonomiya sa Pilipinas.
