CAGAYAN DE ORO CITY – Wala na’y angay imbestigaran ug kasuhan ang Department of Interior and Local Govt o DILG-Cagayan de Oro sa isyu sa grabeng pagsaka sa mga botante sa Brgy Carmen ning syudad.
Kini ang tubag ni DILG City Director Edward Bhagwani kabahin sa rekomendasyon sa Commission on Elections nga angay mohimo usab sa imbestigasyon batok kang Carmen Punong Brgy Kikang Uy nga giakusahan sa kampo ni Cagayan de Oro 1st District Cong. Lordan Suan nga nag-abusar sa paggamit sa residence certificates aron daghang bag-ong botante makasulod sa ilang hurisdiksyon.
Miingon si Bhagwani nga nagsilbi nang ‘moot and academic’ ang maong isyu sanglit gibakwi na sa Comelec ang ilang disqualification case batok kang Kikang.
Siya miingon nga tungod usab sa maong isyu,gitahasan sila sa ilang central office nga susihon ang paagi sa matag-brgy kon giunsa pagpatuman ang brgy residence certificates aron mahimong rehistradong botante ang mga namalhing mga residente gikan sa laing mga lugar.
Gimugna ni Bhagwani ang iyang pahayag epekto sa gisulti sa Comelec sa unang hugna sa pagdungog sa House Committee on Suffrage and Electoral Reforms nga angay mohimo usab sa aksyon ang DILG kabahin sa giatubang nga isyu ni Kikang ning syudad.
Hisayrang anaa sa 44 porsiento ang pagsaka sa mga bag-ong botante sa Brgy Carmen tungod sa pipila ka rason nga naglakip sa makahuluganong pagpangdani ni City Mayor Rolando ‘Klarex’ Uy.
