CAGAYAN DE ORO CITY – Gilugwa ni DILG Sec Eduardo Año ang direktiba diin nagmando sa ilang mga opisyal sa nagkadaiyang rehiyon nga mapasiguro mapatuman ang mando ni Pres Rodrigo Duterte pagpaundang sa investment scam sa Kabus Padatoon o KAPA Community Ministry International Incorporated.
Kini resulta sa unang panagtagbo sa DILG ug Security and Exchange Commission human imando ni Pres Rodrigo Duterte ang pagpahunong sa KAPA kay dakong illegal.
Miingon si Director Edward Bhagwani sa DILG-10 nga mag-imbestigar usab ang ilang ahensiya kon adunay mga opisyal sa gobyerno ang miapil sa maong investment scam.
Si Bhagwani miingon nga dako’g papel ang mga opisyal ilabina ang barangay kapitan nga dili maka-operate ang KAPA sa ilang lugar kon dili sila mohatag permit.
Samtamg gitahasan ni Regional Peace and Order Council o RPOC chairman City Mayor Oscar Moreno ang kapolisan nga bantayan ang Kapa nga dili na makapang-biktima sa katawhan sa Northern Mindanao.
Gibutyag ni Moreno nga gideklarang investment scam ang KAPA ug angayan lamang nga dakpon ang mga nagpasiugda niini.
Siya miingon nga tungod kay illegal ang maong grupo, kinahanglan nga ipatuman kon unsa ang nalatid sa balaod.
Nanawagan usab kini sa KAPA victims nga dili masuko tungod kay giprotektahan lamang sila sa gobyerno.
