CAGAYAN DE ORO CITY, Philippines – Wala pa’y gipagawas nga marching order ang bag-ong kalihim sa Department of Interior and Local Government (DILG) human nalambigit ang mga high ranking officials sa PNP Class 1996 ug 1997 sa duguong ‘war on drugs’ sa miaging administrasyon.
Namahayag si Interior Secretary Jonvic Remulla nga hulaton una nila ang resulta sa imbestigasyon sa House of Representative Quadrupole Committee ayha mupasaka’g kaso.
Mipasalig si Remulla nga mupatuman sa patas nga imbestigasyon ang DILG sa subling pagbukas sa kasong extra judicial killings o “EJK” kalabot sa gibulgar nga testimonya ni retired police colonel Royina Garma nga gipatuman ang Davao Model ug Reward System sa summary killings sa mga tigpayuhot sa ilegal nga druga sa Cebu City, dihang nagsilbi siyang city police director sa maong lugar.
