Dili Happy ang mga mamumuo karong labor day,kini ang giingon sa Kilosang Mayo Uno pinaagi ni Tita Hadman sa iyang interbyu sa Bombo Radyo.
Butyag niya nga tungod sa padayon nga pagsaka sa presyo sa mga palaliton, ilabi na sa oil products, misaka usab ang presyo sa bugas, pamasahe, ug uban pang adlaw-adlaw nga panginahanglan.
Matod pa niya, dili na maigo ang ₱486 minimum wage sa mga trabahante ilabi na sa padayon nga inflation ug pagtaas sa gasto sa panginabuhi.
Busa, panawagan sa grupo ang ₱1,200 minimum wage nationwide aron matubag ang panginahanglan sa mga trabahante ug ilang pamilya.
Lakip usab sa ilang hangyo ang pagsuspende sa VAT ug excise tax sa oil products aron mapakunhod ang epekto sa kamahal sa presyo, ilabi na sa transport sector nga apektado sa taas nga gasto sa operasyon.
Giingon ni Hadman nga kung walay konkretong aksyon ang gobyerno, magpadayon lamang ang kalisod nga nabati sa mga mamumuo ug sa sektor sa transportasyon.
