CAGAYAN DE ORO CITY – Napulihan sa kabalaka ug kalisang ang gibating kahinam sa katawhan nga nakakita sa talagsaong panan-awon sa kawanangan sa Northern Mindanao kaganihang kadlawon.
Kini human unang gitoohan nga natural meteor showers ang miagi sa kawanangan sa Mindanao rason nga nahugway ang mga tawo ug nagpabati sa ilang tagsa-tagsa ka pangindahay ug kagustuhan.
Apan sa pagsuta pinaagi sa buhatan sa Philippine Atmospheric Geo-physical and Astronomical Services Administration o PAG-ASA,gisaysay nila nga rocket debris gikan sa China ang misulod sa teritoryo sa Pilipinas.
Nahimugso ang kabalaka sa kadaghanan kon unsay katuyuan sa maong nasud kon nganong nangabot ang ilang rocket debris sa air space sa Pilipinas.
Sa pagkutlo ning balita, wala pa’y komento ang ubang mga ahensiya sa gobierno ilabina ang nasudnong depensa kabahin niini.
Dumduman nga sa miaging semana,miduaw si Defense Secretary Gilberto Teodoro Jr sa Cagayan de Oro City diin gisusi niini kuyog ang AFP officials ang mga pasilidad sa kanhi Lumbia Airport nga pahimutangan na sa 15th Strike Wing sa Philippine Air Force.
Sugdan na usab ang pagtukod sa istraktura sa Enhanced Defense Cooperation Agreement o EDCA sulod sa maong tugpahanan nga dumalahon sa tropang Amerikano.
Hisayrang ayha nahidangat si Teodoro sa Northern Mindanao, nasiplatan ang pagsulod sa Russian submarine sulod mismo sa kadagatang sakop sa Pilipinas nga gika-alarma pag-ayo ni Pres Bongbong Marcos.
