“We dont need people power what we need is people to unite in prayer!” Mao kini ang pamulong ni Pastor Jeff Baconga sa Cagayan de Oro Evangelical Council sa pagtak-op sa prayer rally sa mga evanhelical churches sa syudad kagahapong adlawa para iampo ang nasud batok sa mga isyu sa korapsyon.
Sa usa ka interbyu sa Bomb Radyo giklaro sa pastor nga ang maong pito ka adlaw nga kalihokan, nga nagsugod niadtong Hulyo 5, usa ka panaghiusa sa mga evangelical leaders ug organisasyon alang sa pagpangayo og divine intervention.
Hinuon, gipamatud-an sa pastor nga ang ilang grupo wala mosuporta sa mga rally batok sa gobyerno o mga rebelyosong lihok, kay ang pag-ampo lamang ang ilang gitan-aw nga solusyon sa mga korapsyon nga naghitabo sa nasod.
Agig pagtapos, gipasalig ni Baconga nga ang maong pag-ampo gipasukad sa pagtuo nga kon ang katawhan magpaubos ug mag-ampo, makaangkon og kalinaw og kaayuhan ang nasod.
