CAGAYAN DE ORO CITY – Nakompiskar sa CIDG-10 ang kagamitan sa kalihukang terorismo sa usa sa tulo ka balay diha sa Phase 2,Brgy Bulua sa syudad kaganihang buntag.
Kini human isilbi sa mga otoridad ang tulo ka search warrants gikan sa korte batok sa suspected Dawlah Islamiya Lanao terror group member nga si Adbulrahman Limpao Impang alyas Supida.
Gibutyag ni CIDG 10 regional chief Lt Col Choli Jun Caduyac nga nakompiskar sa balay nga gisak-an ni Impang ang mga gamit paghimo’g bomba,duha ka armas ug bandila sa grupo sa mga terorista.
Miingon si Caduyac nga wala nila maabti si Impang ingon man sila si Siepe Layla Ampao ug Allison Limbao Muskuwa dihang gisilbi ang tulo ka search warrants kaganihang buntag.
Apan sa paglusob sa CIDG-10 ug tropa sa Cagayan de Oro City Police Office wala sa tulo ka balay ang tulo ka personalidad nga target sa operasyon ang mga kabanay lamang niini.
Ipadayon sa mga otoridad ang pagsunod sa tulo ka personalidad samtang giandam na nila ang kaso batok kang Impang.
Samtang gitahasan ni City Mayor Oscar Moreno ang katawhan nga magmatngon sa kanunay alang sa proteksyon sa seguridad sa syudad.
Kini ang reaksyon ni Moreno sa paglusob sa CIDG-10 sa lokasyon sa suspected member sa grupong Dawlah Islamiya Lanao terror group diha sa Phase 2,Brgy Bulua sa syudad.
Gibutyag sa mayor nga dili angay luagan ang pagbangay publiko kuyog sa mga otoridad aron likayan ang pagkasubli sa terror bombing sa Kyla Bystro sa Limketkai Arcade diin daghang kinabuhi ang nakalas sa syudad tuig 2013.
