CAGAYAN DE ORO CITY – Wala mausik ang gipatuman ni kanhi Police Regional Office 10 Director Brig Gen Jaysen De Guzman ang pag-disiplina nga inubanan sa integridad ug sentro sa katawhan nga pagdumala sa pamulis sa Northern Mindanao.
Kini human lakbiti ni PNP chief directoral staff Lt Gen Edgar Alan Okubo ang katibuk-ang resulta sa trabaho ni De Guzman isip pinakataas nga opisyal sa pulis sa rehiyon atolsa opisyal nga pagbakante niini kay gipuli ang iyang mistah nga si Brig Gen Rolindo Suguilon sa Kampo Alagar kagahapong adlawa.
Miingon si Okubo nga nalipay si PNP chief Gen Nicolas Torre III sa nahatag nga performance ni De Guzman nga napabalik ang pagsalig sa katawhan ngadto sa kapolisan taliwala nga wala ra mag-tuig ang iyang pagdumala sa PRO 10.
Tungod niini,gihatagan sa PNP sa taas nga pagsaludo ang liderato ni De Guzman sa PRO 10 ug unta magamit gihapon niya sa iyang bag-ong tahas isip regional director sa PRO-Bangsamoro Autonomous Region in Mindanao.
Giawhag usab ni Okubo ang mga pulis nga nabilin sa PRO 10 nga ihatag kang Suguilon ang tukmang suporta ug pagsunod sa mga direktiba aron pabiling mamintinar ang kahusay’g kalinaw sa rehiyon.
Hisayrang si Suguilon ug De Guzman ang manag-kauban sa PNPA Class of 1995 diin taas-taas nga panahon nga nagkauban sa ilang tagsa-tagsa ka mga tahas ubos sa PRO 10.
