Dismayado ug gikasuko’g maayo ni Davao City 1st District Cong.Paulo ‘Pulong’ Duterte ang giingong desperado ug politikanhong lakang aron ipalagpot sa kamarabaha si Vice Pres Sara Duterte.
Kini ang reaksyon sa kongresista nunot sa daghan sa iyang mga kauban sa kamarabaha nga nagpirma sa ikaupat nga impeachment complaint batok Sara aron taralon sa senado gamit ang pipila ka articles of impeachment.
Miingon si Pulong nga natigayon kini tungod sa mga pagmaniobra sa pipila ka kongresista pinanguluhan usa ka Rep. Garin nga maoy nangulekta sa mga pirma aron mapadali ang pag-aprobar ug pagsaka sa walay basehan nga reklamo.
Siya miingon nga dayag kini nga pagpanglutos sa kamarabaha kang VP Sara.
Dugang sa anak-lalaking kongresista ni kanhi Pres Rodrigo Duterte nga kon wala sila malisang sa sobra milyon nga suporta kang VP Sara gikan sa Iglesia Ni Cristo,nagkahulugan kini sa mas grabe pang unos nga sagubangon sa kasamtangang administrasyon.
Saysay pa niini nga kon nagtoo ang Marcos administration nga mapalihok nila ang impeachment batok Sara nga walay mosumbalik kanila, dako nila kini nga kasaypanan.
Kini tungod kay wala lang mag-sentro kang VP Sara ang impeachment apan mismo sa katawhang Pilipinhon.
Mitapos kini sa pag-ingon nga ang maong dinanghag nga pagpangabuso sa gahom ang dili mopabor sa administrasyon sa katibuk-an.
