Hugot nga gipahinumdoman ni PRO10 Regional Director Police Brigadier General Christopher Abrahano,nga walay pilion ug walay labaw sa balaod human nga usa gihapon ka dismissed nga pulis ang nahulog sa baling sa mga awtoridad atol sa usa ka buy-bust operation batok sa ilegal nga droga.
Subay sa taho sa PRO-10, naaktuhan mismo sa mga sakop sa Police Station 8, PDEA, ug City Mobile Force Company si alyas James—nga opisyal nga natangtang sa serbisyo niadtong Hunyo 18, 2026—kauban silang alyas Tams ug alyas Apon sulod sa usa ka abandonadong balay samtang nagpahigayon og pot session sa Barangay Lumbia.
Atol sa maong hiniusang operasyon, nakumpiska gikan sa mga suspetsado ang walo ka sachet sa gidudahang shabu nga mitimbang og 50 grams ug nagkantidad og 340,000.00 pesos, kauban ang usa ka .38 caliber revolver, tulo ka buhing bala, ug usa ka libo ka pesos nga buy-bust money.
Tungod niini, mag-atubang ug mag-antus sa bug-at nga kasong paglapas sa Republic Act 9165 ug Republic Act 10591 ang maong kanhi sakop sa pulisya ug ang iyang duha kauban nga kasamtangang gibalhog na sa selda.
