Gipasalig ni Defense Secretary Gilberto “Gibo” Teodoro Jr. nga gibuhat na sa kagamhanan ang tanan niining makaya aron palig-onon ang depensa sa nasud taliwala sa mga limitasyon sa pondo.
Sa paghisgut sa pagpangandam sa Armed Forces of the Philippines (AFP) sa territorial defense, gitaho ni Teodoro ang 100 porsiyento nga accomplishment sa militar, apan gipasiugda niini nga dili kayang mapadayon sa dugay kung walay igo nga reserbang mga gamit ug suplay alang sa padayon nga operasyon. Gibutyag usab sa kalihim nga kinahanglang ipahiuyon ang mga operasyon sa militar sa katakus ug kapanguhaan sa nasud aron masiguro nga magpabiling andam ang AFP nga panalipdan ang teritoryo sa Pilipinas.
Dugang ni Teodoro, mahinungdanong mapadayon ang igo nga reserba aron masuportahan ang mga operasyon ug dili mabutang sa alanganin ang malungtarong katakus sa militar nga buhaton ang mga katungdanan niini.
