CAGAYAN DE ORO CITY-Gipaubos na sa Dept of Health o DoH-10 sa code white ang tanang public ug private hospitals nga nakabase sa rehiyon 10.
Kini alayon sa pangandam sa ilang kampanya batok paggamit pabuto sa kasaulugan sa pasko ug pagsugat sa bag-ong tuig.
Miingon si DoH regional director Dr Nympha Torezo nga nagkahulugan kini nga anaa sila sa alerto ilabina nga gimando ni Pres Rodrigo Duterte nga bugtong community public display sa fireworks lamang ang gitugutan alang sa publiko.
Tuyo niini nga kapugngan ang mga tawo nga mabuthan sa nagkadaiyang klase sa pabuto sa maong mga kasaulugan.
Samtang wala pay kumpirmasyon ang City Health Office kalabot sa ordinansa kabahin sa “firecracker ban” nga ipatuman sa syudad panahon sa pagselebrar sa pasko ug bag-ong tuig.
Si CHO head Dra Fe Bongcas miingon nga mas maayong gamiton ang torotot ug uban pang klase sa matang nga makahimo’g saba inay mga pabuto nga dunay taas nga risko sa pagka-aksidente sa lawas sa tawo.
Gawas niini, gitin-aw ni Bongcas nga kadtong gusto magpabuto o magpasundayag sa fireworks, mahimo nila kining buhaton sa mga designated nga area nga layo sa peligro sa tawo ug mga insidente sa sunog.
Samtang tungod sa walag-tuo nga party matag Disyembre, nagpadumdum si Bongcas nga likayan ang pagpalabi’g kaon sa lechon,mga parat ug tam-is nga pagkaon.
