CAGAYAN DE ORO CITY – Gitawag nga regalo sa pasko sa Department of Health o DoH-10 sa mga bata nga nag edad 5-anyos paubos ang bakuna batok sa sakit nga polio.
Kini alayon sa kick off sa “Simultaneous SABAYANG PATAK Campaign kontra POLIO” nga gihimo sa ahensiya sa covered court sa Brgy Gusa ning syudad kagahapon sa buntag.
Gibutyag ni DoH-10 Reg Dir Adriano Subaan nga haom nga gasa sa pasko ang ilang gihimong pagbakuna sa mga bata aron malikay sa polio.
Gipanganti niini nga ilang palig-unon ang kampaniya pagseguro nga dili na madugangan pa ang ihap sa polio cases.
Misaka na sa unom ang nataptan sa sakit sa tibook Mindanao.
Samtang ipatuman sa City Health Office o CHO ang intensive week alang sa SABAYANG PATAK Campaign kontra POLIO” sulod ning semanaha.
Kini sa tumong nga ilang makab-ot ang target nga mabakunahan ang 80 hangtud 85-mil ka bata nga nag-edad sa 5-anyos paubos sa tibook syudad.
Gibutyag ni City Health officer Dra. Lorraine Nery nga ilang ipatuman ang door to door ‘oral polio vaccine’ sa matag panimalay sa syudad.
Gani, gimanduan usab niini ang brgy health workers ug mga nurse nga seguraduhon nga mabakunahan ang tanang bata ug balikan ang mga panimalay nga wala mabakunahi.
