CAGAYAN DE ORO CITY – Gikasubo sa Dept of Health o DoH-10 nga pakyas sila pag-contact trace sa tinubdan sa bayrus nga mitakboy sa 30 anyos nga lalaki nga residente sa Brgy Mahayahay,Iligan City.
Kini human kompirmaha ni DoH regional director Dr Adriano Suba-an nga nag-atubang sa local transmission sa bayrus ang maong dakbayan.
Miingon si Suba-an nga sa wala pa matakdi ang maong trabahante,nakadalikyat pa kini sa Lanao del Norte ug Cagayan de Oro City sa miaging semana.
Kini ang hinungdan nga gilusad ang extensive contact tracing aron ma-isolate ang mga tawo nga gikauban sa maong pasyente.
Samtang dili una angay magpataranta ang publiko kabahin sa pagtoon sa health experts nga mahimong matakdan ang tawo sa coronavirus pinaagi usab sa hangin.
Kini human unang giuyunan sa World Health Organization o WHO experts ang findings sa sobra 200 ka scientists nga dili lamang pinaagi sa laway sa tawo makuha niini ang maong sakit.
Gibutyag ni DoH-10 infectious disease cluster head Dr Ian Gonzales nga wala pa mapamatud-i ang maong pagtoon apan nakig-koordinar usab ang Pilipinas sa WHO kabahin niini.
