CAGAYAN DE ORO CITY – Gikompirmar ni Regional State Prosecutor Atty Merlynn Uy nga gikonbikto sa korte sa kasong act of lasciviousness ug sexual harassment ang kanhi hepe sa city veterinary office nga si Dr. Anthony Acac ning syudad.
Miingon si Uy nga nagsumikad ang maong kaso sa usa ka hitabo diin gi-reklamo si Acac sa iyang empleyadong babaye sa hukmanan tungod sa law-ay nga binuhatan niini sulod sa opisina sa miaging Agosto 21,2021.
Miingon si Uy nga tungod sa gimbug-aton nga basehan nga nakita sa korte nga nagdungog sa kaso,gisilutan ang akusado nga mabilanggo sa sobra 4 ka tuig ug pagbayad sa damyos moral ngadto sa maong biktima.
Sukad mibuto ang maong isyu,mas gipili sa akusado nga magpakahilom ug gisalig ang pag-depensa sa iyang kaugalingon ngadto sa gikuha niini nga abogado.
Samtang makalikay nga masulod sa prisuhan ang maong doktor kon dili na niya hagiton pa ang hukom sa korte.
Kini maoy kabahin sa legal remedy nga gisugyot ni Uy ngadto kaniya.
Miingon si Uy nga kon moduso ug ma-aprobahan sa korte ang motion to avail probation ni Acac,dili na siya masulod pa sa bilangguan aron silbihan ang mga tuig nga gipahamtang batok kaniya.
Kini ang hinungdan nga anaa sa maong kanhi opisyal sa city hall ang pagtutalimbang sa hukom kon plano niini modangop sa korte suprema o mo-avail sa petition for probation.
