CAGAYAN DE ORO CITY – Gibaharan ni City Mayor Oscar Moreno nga kasuhan ang doktor nga unang mibulgar nga dili ensakto ang mga impormasyon nga gipagawas sa city hall kabahin sa kampanya batok coronavirus disease sa syudad.
Miingon si Moreno nga angayang dili magpagamit sa mga politiko si Dr Franco Bogito aron malikay sa kahugaw sa politika.
Gikasuko sa mayor kon nganong gi-komentaryuhan ni Bogito ang inadlaw nga pagpagawas sa data sa city health office ug Dept of Health kabahin sa kampanya kontra bayrus sa syudad.
Samtang wala nagpagamit sa politika apan kaugalingong medical opinion lamang ni Dr Franco Bogito ang gipabati niini kabahin sa tinud-anay nga kahimtang samtang nag-atubang sa bahad sa COVID-19 sa syudad.
Kini ang pag-depensa ni Luwas Kagayan convenor Atty Mart Maandig batok sa batikos ni Moreno tungod sa medical opinion ni Bogito.
Namahayag si Maandig nga data gikan sa Dept of Health ang gi-basehan nila sa ilang komentaryo sukwahi sa giakusar sa mayor nga nag-imbento sila sa mga impormasyon.
