Gipagawas ni Orlando Ravanera sa Task Force Macajalar ang usa ka libro nga nagdokumento sa padayong problema ug paglapas sa katungod sa mga Lumad sa Mindanao ug sa tibuok nasud.
Ang maong libro nga may titulo nga “How Oppressed Our IPs Are?”.
Unod niini ang paglambigit sa tinuod nga kahimtang sa mga Lumad ug sa ilang pakigbisog aron mapanalipdan ang ilang yutang kabilin.
Gibutyag ni Ravanera sa BOMBO RADYO nga sa maong libro gipakita ang tanang klase sa pagtamastamas sa mga Lumad sama sa pagilog sa ilang yuta, katubigan, ug ancestral domains nga maoy tinubdan sa ilang panginabuhi.
Makasubo matod pa kini kay inay mapreserbar alang sa mga Lumad, daghan sa mga lugar gipangtukoran na sa dagkong plantasyon ug komersyal nga proyekto.
Tungod sa hitabo, daghang Lumad ang nawagtangan sa ilang puloy-anan ug mapugos nga mobiya sa kaugalingong yutang natawhan.
Tipik sa unod sa libro ang mukabat sa 101 ka Lumad nga gipatay sa Mindanao human sila mibarug ug misukol batok sa pag-ilog sa ilang yuta.
Nanawagan si Ravanera ang hustisya alang sa mga Lumad. (Contributor: James Oliver)
