Gipahibalo ni Los Angeles Lakers head coach JJ Redick nga giisip nga day-to-day ang guard nga si Austin Reaves tungod sa gamay nga bun-og sa iyang wala nga tikod, samtang gilauman nga makadula si NBA scoring leader Luka Doncic sa ilang sunod nga duwa batok sa Phoenix Suns karong Domingo human mapiang ang iyang tuo nga buolbuol.
Naangol ang duha atol sa 123-112 nga kadaogan sa Lakers batok sa Milwaukee Bucks niadtong Miyerkules sa gabii, nga maoy ilang ikapito nga sunod-sunod nga kadaogan ug nakapauswag sa ilang rekord ngadto sa 11-2, ang labing maayong rekord sa NBA niadtong panahona.
Naangol si Reaves sa ikatulong kwarter human dili maayo ang iyang pagdunggo sa salog atol sa pagsulay og dunk, apan human sa negatibong resulta sa unang X-ray, nagkasinabot ang magdudula ug ang team nga dili na ipadayon ang dugang nga imaging examination ug ilista na lang siya isip day-to-day.
Samtang, giisip usab nga day-to-day si guard Collin Sexton human magbangga ang ilang ulo ni Milwaukee guard Ryan Rollins, apan gipamatud-an ni Redick nga walay concussion si Sexton, samtang si Doncic nanguna sa NBA sa average nga 38.6 puntos matag duwa ug si Reaves adunay average nga 24.7 puntos matag duwa. (raniel mahunyag)
