CAGAYAN DE ORO CITY – Naibta’g tunok ang pamilya Dormitorio sa laras nga pagka-kombikto sa tulo ka principal accused sa pagpatay kang late PMA Cadet 4th Class Darwin Dormitorio samtang nagtungha pagkasundalo sulod sa Philippine Military Academy sa Baguio City.
Kini ang pagsaysay sa tigpamaba sa pamilya nga si Dexter Dormitorio sa interbyu sa Bombo Radyo.
Namahayag si Dormitorio nga nalipay ang pamilya kay gitun-an ug nasabtan ni RTC Branch 5 Presiding Judge Ligaya Rivera kon unsa ang anaa sa PMA rason na-establisar ang hukom nga guilty beyond reasonable doubt batok sa tulo ka upperclassmen ni Dormitorio nga naglakip kanila ni kanhi Cadet 3rd Class Shalimar Imperial Jr ug Felix Lumbag Jr ug Julius Carlo Tadena.
Sila Imperial,Lumbag ug Tadena ang gihukman sa kasong murder ug anti-hazing law violation diin sila tag-40 ka tuig mabalhog sa prisohan.
Gipasalamatan sa pamilya ang kahitas-an nga nagbunga ang sakripisyo pagpangita’g hustisya alang kang Darwin nga gipuli-puliha’g dagmal sa unom ka kadete hinungdang namatay niadtong kadlawon sa Setyembre 18,2019.
Samtang wala matago pamilya Dormitorio ang ilang dakong kadismaya sa liderato sa Philippine Military Academy Alumni Association.
Kini tungod kay inay sila ang motabang pagpangita’g hustisya,nagsilbi na hinoon nga babag dihang nagsugod na ang pagligid sa imbestigasyon.
Miingon si Dexter nga gipugngan sila sa PMA alumni nga mabulgar sa katawhan kon unsay tinud-anay nga nahitabo sa iyang manghod.
Siya miingon nga dili lalim ang naagian sa pamilya ilabina nga pipila sa mga akusado ang mga anak ug kabanay usab sa aktibo nga dagko’g ranggo nga mga sundalo.
Hisayrang namatay si Darwin tungod sa brutal hazing rason subli nabutang sa kontrobersya ang liderato sa PMA.
