CAGAYAN DE ORO CITY – Natagbaw ang pamilya ug kabanay ni Cadet 4th Class Darwin Dormitorio sa hukom sa korte batok sa tulo ka akusado nga hinungdan sa kamatayon niini samtang nagtungha pagka-sundalo sa Philippine Military Academy o PMA sa Baguio City.
Kini ang emosyonal nga reaksyon sa inahan nga si Jasmine Dormitorio kinsa nakahilak ug nagdanguy-ngoy samtang kamulo gibatbat ang sentensiya batok kanila kanhi PMA Cadets 3rd Class Shalimar Imperial Jr ug Felix Lumbag Jr ug Julius Carlo Tadena.
Namahayag si Gng. Dormitorio nga unta pinaagi sa pagka-sakripisyo sa kinabuhi ni Darwin,maundang sa hingpit ang hazing sa mga kadete sulod sa academy.
Siya miingon nga bisan sa grabeng kasakit,apan mibati gihapon kini’g kalooy sa mga ginikanan sa mga kombiktado kay pulos lang sila biktima.
Dumduman nga sa wala pa mibuto ang kontrobersya, gipa-video message ug gipakanta pa kini ni Imperial aron ipahinungod sa hinigugma niini nga nagtungha usab dinhi sa dakbayan.
