CAGAYAN DE ORO CITY-Gibatikos sa kampo ni City Mayor Oscar Moreno si Brgy 33 Kap Conrad Lim tungod sa pag-reclaim sa portion sa dagat diin gitukod sa DPWH-10 ang balor P4-B nga coastal road sa Brgy Lapasan sa syudad.
Gihimo ni CSWD officer Teddy Sabugaa ang pagsaway dihang nasuta nga dili makapadayon ang DPWH-10 pagtiwas sa proyekto tungod sa kabtangan ni Lim nga nakababag sa lugar.
Si Lim ang nakakuha’g sertipikasyon kaniadto sa city council diin gigamit niya sa pag-apply sa Philippine Reclamation Authority o PRA aron maangkon ang duluna nga iya unta sa gobierno.
Samtang gihuptan ni Lim ang legal nga basehan sa pag-angkon sa rights sa portion sa dagat nga gi-aplayan niya sa reclamation sa Philippine Reclamation Authority o PRA.
Kini maoy depensa sa alyado ni Lim diha sa konseho nga si Kag Leon Gan.
Namahayag si Gan nga ang pagmando sa Office of the Solicitor General sa DPWH-10 nga mokaso’g expropriation case batok Lim ang lig-ong basehan nga giila siya sa PRA nga tag-iya niini.
Matagbo ang DPWH-10 ingon man ang PRA kabahin sa istraktura nga gitukod ni Brgy 33 Kap Conrad Lim diha sa Brgy Lapasan sa syudad.
Kini aron masuta kon unsa’y angay nila nga buhaton nga makuha’g balik ang kabtangan sa gobierno nga na-reclaim ni Lim.
Gibutyag ni DPWH regional spokesperson Vinah Jean Maghinay nga pabiling 85 porsiento pa lamang ang nahuman sa coastal road project kay nakababag ang reclaimation ni Lim.
Nasuta nga dul-ag 10 ka tuig na ang proyekto isip alternative road sa syudad apan pabiling wala pa gihapon mapusli sa publiko.
