Nagpatuman sa lapad nga lahugay (reshuffling) ang Department of Public Works and Highways (DPWH) human sa seryosong mga alegasyon sa korapsyon ug substandard nga mga proyekto sa flood control.
Si Presidente Ferdinand Marcos Jr. mismo ang mipahibalo nga adunay 15 ka kontraktor nga nakadawat sa kapin P100 bilyon nga pondo gikan sa 2022 hangtod 2025, apan daghan sa ilang mga proyekto wala makahatag og klarong detalye sa istruktura.
Ang mga mayor sama nila Benjamin Magalong sa Baguio, Vico Sotto sa Pasig, Joy Belmonte sa Quezon City, ug Sitti Hataman sa Isabela City mipirma sa usa ka pahayag nga nag-awhag sa DPWH nga ipangalan ang mga politiko ug kontraktor nga nalambigit sa mga depektibo nga proyekto.
Ang grupo nga Mayors for Good Governance nagduso sa transparency ug hustisya, nga angay ipahamtang sa mga nakasala.
Si Magalong maoy unang nagbisto sa kalambigitan sa pipila ka mga kongresista sa mga palpak nga proyekto.
Si Marcos Jr. miingon nga ang mga kontraktor nga klarong wala magtarong sa ilang trabaho ipasulod sa blacklist ug dili na makakontrata sa gobyerno.
Gikasuhan usab ang mga indibidwal ug kompanya nga wala makahatag sa maayong pagpasabot sa paggamit sa pondo.
Sukad nahuman ang ikatolo nga State of the Nation Address (SONA) sa president, gisugdan na’g presyur sa Senado ang buhatan sa DPWH aron ipahibalo ang mga detalye sa proyekto, lakip ang bill of quantities ug feasibility studies.
Daghang lokal nga opisyal ang nagreklamo nga wala sila giapil sa konsultasyon sa mga proyekto.
Ang reshuffling gitumong aron maputol ang sistematikong korapsyon ug maibalik ang pagsalig sa publiko sa ahensya.
