CAGAYAN DE ORO CITY – Nagtoo ang Commission on Elections Norther Mindanao nga paboran sa ilang kadagkuan nga masibog ang disqualification case nga giatubang ni Carmen Punong Brgy Kikang Uy diin siya milansad pagka-kongresista sa distrito uno sa dakbayan.
Kini ang personal nga pangagpas ni Comelec 10 Director Atty. Renato Magbutay kabahin sa mosyon sa ilang law department sa kauluhan nga isibog una ang kaso kay may mga himoon pa sila nga pagtutok balik sa mga dokumento ug mga ebedensiya.
Siya miingon nga tungod kay law department lawyers nila ang naghandos sa maong hangyo, dako’g tsansa nga tugtan kini sa 2nd division sa Comelec.
Dumduman nga nangunay pagduso’g kaso ang Comelec batok Kikang kay nagtoo sila nga mihimo kini’g pag-abuso gamit ang naghinobra nga paglugwa sa barangay resident certifications aron makasulod ang sobra 8-mil ka bag-ong mga botante sa lugar.
Hisayrang wala pa usab makasugod ang congressional inquiry kabahin sa grabeng pagsaka sa ihap sa mga botante sa pipila ka bahin sa nasud diin naglakip sa Brgy Carmen.
