CAGAYAN DE ORO CITY, Philippines – Wala mapugngi ni Dr. Lox Andutan, anak ni anhing Dr. Winston Andutan, ang pagsaway sa pipila ka grupo nga migamit sa hulagway sa iyang amahan isip biktima sa summary killings panahon sa war on drugs campaign sa kanhi administrasyong Duterte.
Sa usa ka exclusive interview sa BOMBO RADYO, gitin-aw ni Dr. Lox nga ang iyang amahan gipatay tungod sa personal nga mga rason sama sa selos, kasuya, ug kalagot sa mga suspek.
Kini nga mga suspek dugay nang nadakpan ug naglaum nga madugta sila sa prisohan.
Iyang gipahayag nga dili biktima sa Extra Judicial Killings (EJK) ang iyang amahan ug gibadlong ang mga grupo sa mga doktor ug raliyesta nga likayan ang paggamit sa hulagway sa iyang amahan sa ilang social media posts.
Siya miingon nga peke ug dili tinuod ang mga impormasyon nga ilang gipahungaw bahin sa kamatayon sa iyang amahan.
Ang pamilya Andutan naghunahuna kung mupasaka ba sila og kaso batok sa grupo nga nagdaot sa kredibilidad ug ngalan nga giampingan sa ilang amahan.
Mahinumduman nga si Dr. Winston gipatay niadtong Disyembre 2, 2021, sa Barangay Nazareth, ning syudad.
Ang mga suspek mitug-an nga sila gibayran og PHP 150,000 aron ilikidar ang biktima.
Lakip sa mga nadakpan mao sila Marjun Abayon Cabug, Joel Arcilla Nacua, ug Jomar Pacilan Adlao, samtang si Rene Turtosa nakalingkawas.
Ang motibo sa pagpatay giingon nga personal nga mga isyu, apan ang imbestigasyon nagpadayon aron masuta ang tinuod nga hinungdan.
Kini nga klarifikasyon naghatag sa hustisya sa ngalan ni Dr. Winston Andutan ug nagpakita sa kamatuoran sa likod sa iyang trahedya.
