CAGAYAN DE ORO CITY – Nag-atubang sa kasong kriminal ang pickup driver nga nakabangga-patay sa menor de edad ug laing duha ang angol sa highway sa Naawan,Misamis Oriental.
Giila ni Naawan Police Station commander Police Maj. Reynante Labio ang namatay’ng biktima nga si Erica Mae Basinay samtang pabiling ubos sa obserbasyon ang laing kauban niini sa ospital dinhi sa syudad.
Miingon si Labio nga mi-overtake ang driver nga si Edward Jimenez Jr nga taga-Lugait ning lalawigan sa dakong trak apan daw nawad-an sa kontrol kay giingong nakatagpilaw.
Kini ang rason nga nabanggaan niini ang mga biktima nga igo lang nagbaklay samtang pauli gikan sa ilang tunghaan sa miaging adlaw.
Kasong reckless imprudence resulting in homicide ug double physical injuries ang gipasaka sa kapolisan batok sa suspek sa piskalya sa probinsya.
Apan kon mouyon usab ang mga pamilya sa amicable settlement sa hitabo,dako ang tsansa nga masibog ang kaso.
