CAGAYAN DE ORO CITY – Gipasaka na ang kasong paglapas sa Tariff and Customs Code of the Philippines batok sa driver ug pahenante nga mikarga sa 200 ka kahon sa peke nga sigarilyo, sa piskalya sa Iligan City.
Mismo ang task force kalikasan ug Iligan City Police Office ang misang-at sa kaso batok nila Mark Eugene Fernandez Dolorican, 24 anyos, ang truck driver ug ang iyang helper nga si Ronni Concepcion Baquiran, 29, pulos nagpuyo sa Zamboanga City.
Namahayag si Iligan City Information Officer Joe Pantoja nga padayong nagmagahi ang duruha kung kinsa ang tag-iya sa ilang gikarga nga mga peke nga sigarilyo.
Una niini, gikan sa Zamboanga ug padulong unta sa Davao City ang ruta sa duha ka mga suspek.
Kapin 4-Milyon pesos ang street value sa nasanta nga ilegal nga kargamento.
